काळजीवाहू मुख्यमंत्री एकनाथ शिंदे आजारी, मुख्यमंत्री एकनाथ शिंदेंच्या दरे गावी बंगल्यावर डॉक्टरांची टीम दाखल
मोहन चौकेकर
राज्याचे काळजीवाहू मुख्यमंत्री एकनाथ शिंदे हे सध्या आपल्या साताऱ्यातील मूळ गावी आले आहेत. सत्ता स्थापनेच्या धावपळीतच ते गावी आल्याने अनेक चर्चांना उधाण आलं होतं. मात्र आता गावी आल्यानंतर मुख्यमंत्री एकनाथ शिंदे हे आजारी पडल्याची माहिती समोर येत आहे. त्यांच्या दरे येथील बंगल्यावर डॉक्टरांची टीम दाखल झाली आहे मुख्यमंत्री एकनाथ शिंदे यांना घशाचा आजार, घश्याचा संसर्ग झाला आहे .मुख्यमंत्री एकनाथ शिंदेना १०४° ताप असून त्यांना सलाईन लावल्याचे समजते आहे.
प्रकृतीच्या कारणास्तव काळजीवाहू मुख्यमंत्री एकनाथ शिंदे आज बाहेर पडले नाहीत. त्यांनी घरीच आराम करणे पसंत केले. ऐन राजकीय घडामोडींच्या काळातच काळजीवाहू मुख्यमंत्री एकनाथ शिंदे यांची प्रकृती बिघडली आहे.
विधानसभा निवडणुकीत महायुतीला मिळालेल्या घवघवीत यशानंतर आता मुख्यमंत्रीपदाचा मान कोणाला मिळणार यावरून स्पर्धा सुरू आहे. मुख्यमंत्रीपदाची माळ देवेंद्र फडणवीस यांच्या गळ्यात पडण्याची शक्यता आहे. ऐन शपथविधी सोहळ्याची वेळ जवळ येते तेच नाराज एकनाथ शिंदेंनी थेट आपले दरे हे गाव गाठले आहे.
माजी मंत्री दीपक केसरकर माघारी गेले..
शिंदे गटाचे नेते माजी मंत्री दीपक केसरकर हे काळजीवाहू मुख्यमंत्री एकनाथ शिंदे यांना भेटायला त्यांच्या दरे या गावी आले होते. मात्र एकनाथ शिंदे यांची तब्येत ठीक नसल्याने दिपक केसरकर यांना बंगल्याच्या गेटवरूनच माघारी परतावे लागले. दरम्यान दिपक केसरकर मुंबईला रवाना झाले.
